Istoria Domain .TL

Country code Top Level Domain (sigla ccTLD) nudar estensaun (extension) ka letra hirak nebe kolokadu iha domain name nia kotuk.

Domain Name nee rasik nudar naran uniku iha mundu internet ho nian estensaun (letra iha kotuk) hodi reprezenta karater instituisaun dalaruma refleta mos paiz nia orijin.

Estensaun domain popular sira iha mundu internet mak hanesan .com ba komersial/kompania .net ba kompania IT & telekomunikasaun .org ba organizasaun no seluk tan. facebook.com google.com yahoo.com hanesan izemplu balun ba domain ho nian estensaun.

Ba Timor-Leste mak .tl (DOT TL) tuir rekezitu ISO 3166-1 Standart, nudar identidade Timor-Leste nian iha mundu internet. Estensaun domain ida ne'e mosu hafoin TL restaura nia independensia iha 20 Maiu 2002.

Iha periodu resistensia liu husi komponente resistensia no ativista soliedaridade internasional balun konsege hamosu estensaun domain .tp (dot tp) nudar akronimu ba Timor Portguese iha fulan Dezembru 1997, liu husi operador internet Connect.ie nebe ho nia baze iha Dublin, Irlandia, konteudu husi website sira ho domain .tp kuaze hotu-hotu ho materia publikasaun resistensia nian.

Liu tiha 20 Maiu 2002, TL nudar nasaun independente nebe hetan ona rekuinesimentu internasional, ho nune'e IANA (International Asign Number Authority) fo tan .tl ba TL, maibe ho estatu latutela ba ema ruma tamba estatutu .tp sei existe hela no tutela ba lider timorense Xanana Gusmao nudar kontaktu administrativu. Departamento IT hosi TL nian hato'o pedidu ba IANA iha loron 30 Augustu 2005 hodi halo alterasaun ba domain .tp hodi muda ba .tl.

Iha periodu tranzisaun Departamento IT TL nian serbisu diak ho operador Connect.ie hodi asegura no garantia mudansa no transformasaun nee bele lao ho diak, liu-liu atu asegura dadus sira husi website ho domain .tp ba .tl. Maske nunee domain .tp rasik kontinua existe iha tinan hirak tuir mai no foin lakon totalmente iha fulan Marsu 2015.

Domain .tl (Dot TL), jere no administra husi CoCCA (Council of Country Code Administrator) CoCCA nudar kompania ida nebe fo apoiu ba infra-estrutura internet ida nebe harii iha tinan 2004, husi jestor konsorsiu sira hosi ccTLD nian ho nian baze iha Auckland, Nova Zelandia.

Hosi fontes informasaun nebe iha, ba domain .tl nian jestor no kontaktu administrativu mak ANC (Autoridade Nasional Komunikasaun) CoCCA nudar kontaktu tekniku.

Referensia barak husi paiz seluk iha mundu, hatudu kuaze kada paiz ida-idam utiliza sira nian estensaun domain rasik, ezemplu Indonezia .id, Australia .au Portugal .pt EUA .us Reino Unido .uk etc. Estensaun hirak nee nudar ccTLD ba sira nian pais, no iha autoridade regulador sira mak sei aloka tutan sub-domain ba entidade sira iha paiz refere tuir ida-idak nia karater. Ezemplu iha Indonezia: abcd.co.id ba komersial ka setor privadu, abcd.ac.id ba instituisaun akademiku, abcd.or.id ba organizasaun sira.
Iha mos yahoo.co.id no google.co.id, mezmu kompania rua nee estranjeiru nian maibe sira mos iha prezensa iha Indonezia obrigasaun atu hakruk ba regulamentu interna Indonezia nian.

Iha TL hafoin liberalizasaun setor telekomunikasaun iha tinan 2012 konserteza fo lori mos impaktu balun hanesan numeru utilizador internet aumenta sae.

Maske nune'e, mezmu ohin loron besik ona tama ba komerasaun tinan 20 ba konsulta popular, besik ona komemora tinan 17 ba restaurasaun independensia nian, maibe mosu perguntas balun hanesan tuir mai:
- Domain .tl hira ona mak existe?
- Iha komunikasaun elektroniku, ema hira ona mak utiliza domain .tl?
- Tamba sa instuisaun governu sira uza ona .gov.tl maibe setor privadu sira lafasil atu hetan dalan ba .com.tl, ONG sira lafasil hetan .org.tl? Instituisaun akademiku sira lahetan .edu.tl?
- Tamba sa iha entidade balun nebe existe bele hetan direita ccTLD sem uza sub domain sira?? (Izemplu abcd.tl).
- Presiza ka lae promove domain .tl ba mundu?
- Presiza ka lae halo promosaun/sensibilizasaun domain .tl ba ita nian sosiedade?
- Tamba sa iha TL instituisaun kompetente sira tenta hela atu regulariza atribuisaun domain .tl ba nia socidade maibe kompania registrar estranjeiru sira fa'an malorek hela domain sira nee iha sira nian website?
- Benefisiu saida mak estado TL hetan .tl sekarik naran .tl nia akronimu ho Timor Leste?

Source: https://web.facebook.com/raysoares2412/posts/10156585405332054